24 ноя 00:23Бөлимлер / Ҳәдис

ҚЫЗ ПЕРЗЕНТТИ ТӘРБИЯЛАЎ

ҚЫЗ ПЕРЗЕНТТИ ТӘРБИЯЛАЎ


Уқба ибн Амир разыяллаҳу анҳудан рәўият қылынады:

«Расулуллаҳ саллаллаҳу алайҳи ўа саллам:«Кимниң үш қызы болып, сабыр менен өсирсе, тапқанынан оларды кийиндирсе, олар оның ушын дозақтан перде болады», - деди.

Шарҳ: Бул ҳәдисте перзентке, әсиресе қыз перзентлерге жақсы қараў, оларды сабыр менен өсириў, жедирип, кийиндириў үлкен саўапқа ылайық ис екенлиги айтылмақта. Қызлар көп болса, оларды тәрбиялап, кәмалға келтирип, жай-жайына қойыў қыйын. Қыз балаға туўры тәрбия бериў, әдеп бериў, ийман-Исламды танытыў, жедириў, ишириў, кийиндириў үлкен машақат ис болып, буның ушын ата-анадан үлкен сабыр талап қылынады.

Соның ушын да, ҳәдиси шәрийфте «оларды сабыр менен өсирсе», деп айтылып атыр. Соның ушын Расулуллаҳ саллаллаҳу алайҳи ўа саллам да буған сабыр қылған адамларға жәннетти ўәде қылып атыр.

Әлбетте, үш қызды туўып, тәрбиялап, кәмалға жеткизиў аңсат емес. Бирақ, бул машақатлы ис ушын Нәбий саллаллаҳу алайҳи ўа саллам ўәде қылып атырған сыйлық та аз емес, әлбетте.

Бул ҳәдистен алынатуғын пайдалар:

1.Үш  қызды тәрбиялаў үлкен саўаплы ис екени.
2.Қызлар тәрбиясында сабыр керек екени.
3.Қызларды кийиндириў саўаплы ис екени.
4.Қызлар қыямет күни оларды бағып, өсирген ата-аналары ушын дозақ отынан перде болыўы.

Шайх Муҳаммад Садық Муҳаммад Юсуф раҳимаҳуллаҳтың «Әдеплер ғәзийнеси» китабынан.

Добавить комментарий