16 июл 17:02Жаңалықлар

ХОШ ХАБАР: РЕСПУБЛИКАМЫЗДА ЖӘНЕ БИР МЕШИТ АШЫЛДЫ


ХОШ ХАБАР: РЕСПУБЛИКАМЫЗДА ЖӘНЕ БИР МЕШИТ АШЫЛДЫ



Мәмлекетимизде пуқаралардың басқа ҳуқық ҳәм еркинликлери қатары ҳүждан еркинлигин тәмийинлеўге де айрықша итибар қаратылмақта. Буны бүгинги күнде мешитлеримизде алып барылып атырған қурылыс-ремонт ҳәм абаданластырыў жумыслары мысалында кѳрсек болады.

40 мыңнан зыят халық санына ийе Тахтакѳпир районында усы жылдың май айына шекем тек ғана бир мешит халыққа хызмет кѳрсетер еди. Мине бүгин районда мешитлер саны үш мешитке жетти. Халықтың кѳпшилик бѳлеги райондағы «Халық» жоме мешитине ибадат ушын қатнар еди. Бул әлбетте кѳпшиликке, әсиресе жаздың ыссы, қыстың қыраўлы күнлеринде нураныйлар ушын үлкен машқала туўдырар еди.

Қарақалпақстан мусылманлары қазыяты басламасы менен тийисли шѳлкемлерден рухсат алынып, жергиликли исбилерменлердиң, аўыл халқының кѳмеги менен район орайынан 12 км узақлықтағы «Мүлк» аўыл пуқаралары жыйыны аймағынан «Айымбет ийшан» мешити қурып питкерилди ҳәм 16-июль сәнеси менен Қарақалпақстан Республикасы Әдиллик министрлиги тәрепинен дизимнен ѳткерилгени ҳаққындағы гүўалық диний шѳлкемге тапсырылды.

Бүгин усы «Айымбет ийшан» мешиттиң ашылыў мәресми болды. Онда район ҳәкими Ж.Адилов, Қарақалпақстан мусылманлары қазыяты қазысы Ш.Баҳауаддинов қатнасып, район халқын жаңадан ашылып, ѳз жумысын баслап атырған мешиттиң ашылыў мǝресими менен қутлықлады. Мешит қурылысы ушын ѳзлериниң инсаныйлық кѳмегин берген бәрше инсанларғы ѳзлериниң миннетдаршылығын билдирди ҳәм биринши жума намазы оқылды.

Соның менен елимизде мешитлер саны 2 093 ке, Қарақалпақстанда болса 56 ға жетти. Бул жаңадан ашылып атырған мешит ислам әлеминдеги уллы Қурбан ҳайыты байрамы алдынан республикамыз халқы, әсиресе тахтакѳпирлилер ушын үлкен байрам саўғасы болы.

Аллаҳ таала бул мешиттиң де Қыямет күнине шекем мѳмин-мусылманлар ушын хызмет етиўин несип етсин.








Дерек: Paziylet.uz 

Добавить комментарий
Жаңалықлар лентасы
Көп оқылған мақалалар