«Jawızlıqqa qarsı – aǵartıwshılıq» súreni tiykarında studentler arasında úgit-násiyat ilajı bolıp ótti
«Jawızlıqqa qarsı – aǵartıwshılıq» súreni tiykarında studentler arasında úgit-násiyat ilajı bolıp ótti
Ájiniyaz atındaǵı Nókis mámleketlik pedagogikalıq institutında «Jawızlıqqa qarsı – aǵartıwshılıq» súreni tiykarında studentler arasında úgit-násiyat ilajları, dógerek sáwbetleri, tiyisli taraw qánigeleri menen ushırasıwlar turaqlı ótkerilmekte.
Búgin, 15-fevral kúni bolıp ótken úgit-násiyat ilajında dúnyada júz berip atırǵan hár qıylı siyasiy, ekonomikalıq, áskeriy daǵdarıslı jaǵdaylar sharayatında elimizde tınıshlıqtı támiyinlew, alǵa qoyǵan joqarı maqsetlerimizge erisiw jolında jaslar tárepinen ámelge asırılatuǵın jumıslar jóninde pikir almasıldı.
Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.
Ózbekstan Respublikası Prezidenti Shavkat Mirziyoyev tárepinen alǵa súrilgen Rawajlanıw strategiyasında atap ótilgenindey, muqaddes islam dinimizdiń gumanistlik ideyaların úgit-násiyatlaw, «Jawızlıqqa qarsı – aǵartıwshılıq» principi tiykarında ósip kiyatırǵan jaslarımızdı salamat isenim ruwxında tárbiyalaw búgingi kúnniń áhmiyetli máseleleriniń biri. Óytkeni, biziń eń úlken baylıǵımız – hár qıylı millet hám xalıqlar, diniy konfessiyalar wákilleri arasındaǵı tınıshlıq hám turaqlılıq, óz ara húrmet, awızbirshilik bolıp tabıladı.
Ushırasıwda Awǵanstanda ámelge asırılǵan áskeriy háreketler qatnasıwshısı, nuranıy O.Tóreniyazov, «Qoraqolpoǵiston tongi» gazetasınıń bas redaktorı N.Matyakupova, Nókis qalasındaǵı Muhammed Baqıy iyshan jámáátlik meshitiniń imam-xatibi Sh.Qudaybergenovlar sózge shıǵıp, jawızlıqqa qarsı gúresiwdiń birden-bir tuwrı jolı kitap oqıw, bilim alıw ekenligi, sebebi, kitap oqıw kewilge qáterjamlıq baǵıshlap, hár qıylı jaman oylardı adamnıń sanasınan quwıp shıǵaratuǵınlıǵı, ómirdiń qarańǵı jolların jaqtılandırıwshı nur ekenligi, sonday-aq, kóp kitap oqıǵan adam ómirde úlken tabıslarǵa erisetuǵınlıǵına ayrıqsha toqtalıp ótti.
Ilajda sońǵı jıllarda elimizde jaslardıń bilim alıwı, ilimiy-izertlew jumısları, sonday-aq, isbilermenlik penen shuǵıllanıwı, kásip-óner úyreniwi ushın kóplegen imkaniyatlar jaratılıp atırǵanlıǵı, dúnyada júz berip atırǵan túrlı unamsız waqıyalar, qurallı soqlıǵısıwlar hám urıslar sharayatında elimizde tınıshlıq, paraxatshılıqtıń támiyinlengenligi, álbette, jaslar bunıń qádirine jetip, ózleri de elimizdiń rawajlanıwı, xalqımızdıń tınısh hám abadan turmısta ómir súriwi ushın ayanbay miynet etiwi, bárqulla oqıp, izleniwden toqtap qalmawı zárúrligi atap ótildi.
Derek: NMPI baspasóz xızmeti.
